Autoriteti Kombëtar i Ushqimit merr atributet e Presidentit, i cili u bën "amnisti" të dënuarve ndërsa AKU nën drejtimin e Arben Skënderit bën "amnisti" në faljen e gjobave të bizneseve për shkelje të konstatuara që lidhen me sigurinë ushqimore. Në raportin e KLSH të siguruar nga gazeta “Shqip” shihen abuzimet e bëra dhe falja që po i bën bizneseve të gjobitur drejtuesi i këtij institucioni Arben Skënderi. Në një vendim të qeverisë thuhej se të paktën gjobat me vlerë mbi 300 mijë lekë, do të shqyrtoheshin nga një komision i lartë pranë Ministrisë së Bujqësisë dhe Ushqimit. Por AKU në vend që të dorëzonte dosjet tek ky komision ministror, i ka marrë në shqyrtim gjobat dhe i ka falur me shpejtësi. Në raport shkruhet se “nga auditimi i praktikave të shqyrtimit të ankesave nga Komisioni përkatës pranë DPAKU, është konstatuar se në 3 raste për subjekte janë shfuqizuar gjobat e vendosura nga inspektorët në Tiranë me vlerë 1,300,000 lekë, 700,000 lekë, dhe 1,150,000 lekë). KLSH i kërkon AKU-së që këto para të kthehen në arkën e shtetit, pasi nga auditimi rezulton që vendimet këtij komisioni janë tw pavlefshme. “Drejtoria Rajonale e AKU Tiranë në bashkëpunim me Drejtorinë e Përgjithshme të AKU, të përcjellin pranë zyrave të përmbarimit, vendimet e mësipërme të Gjykatës, me qëllim vënien në ekzekutim dhe arkëtimin e gjobave në vlerën 3,150,000 lekë”, thuhet në raportin e KLSH-së. sipas KLSH-së Këto veprime bien në kundërshtim me përcaktimet ligjore të Ligjit “Për gjykatat administrative dhe gjykimin e mosmarrëveshjeve administrative”.