Presidenti i Ukrainës, Volodymyr Zelenski, tha se manjati rus Roman Abramovich e kishte takuar atë në Kiev dhe i kishte ofruar t'i çonte një mesazh Kremlinit mbi perspektivat e paqes, por udhëheqësi ukrainas përsëriti se qeveria e tij nuk do ta braktiste rajonin e Donbasit. Komentet e Zelenskit për Sky Neës gjatë bisedimeve në Londër shënuan pranimin e tij të parë se miliarderi kishte udhëtuar në kryeqytetin e Ukrainës dhe ishte përfshirë deri diku në negociata. "Ai erdhi në Kiev. Ai tha 'Po ju sjell mesazhe direkte. Dhe dua të marr një mesazh nga ju dhe t'ia jap Presidentit rus Vladimir Putin'. Por ai tha se mesazhi duhet të jetë i heshtur, dhe jo një mesazh publik", tha Zelenski. Presidenti ukrainas tha se vetë takimi "nuk ishte sekret", duke shtuar se rusët donin të dinin se çfarë ishte "gati të bënte Kievi". "Thashë se pyetja nuk ka të bëjë me ne. Ju po luftoni kundër nesh në territorin tonë. I thashë për Donbasin dhe ky ishte mesazhi kryesor. Thashë se nuk do të largohemi dhe nuk do të heqim dorë nga territori ynë. Nuk do t'ju japim një fitore të tillë. Ju nuk do ta merrni atë". Abramoviç, ish-pronari i Klubit të Futbollit Chelsea, i është nënshtruar sanksioneve të vendosura ndaj Rusisë për pushtimin e Ukrainës në vitin 2022. Ai luajti një rol të rëndësishëm në negociatat e pasuksesshme për t'i dhënë fund luftimeve në javët e para të pushtimit dhe në një marrëveshje për të siguruar dërgesat e grurit nga Deti i Zi, por që atëherë ka qenë më pak i dukshëm.Putin e ka bërë të qartë se Rusia nuk është e përgatitur të ndalojë luftimet në Ukrainë derisa Kievi të tërhiqet nga rajoni i Donbasit. Forcat e Ukrainës mbajnë rreth një të pestën e Donetskut dhe Zelenski ka thënë se nuk do ta braktisë atë dhe dhjetëra mijëra ukrainas atje. Zelenski ndërkohë përjashtoi përsëri çdo takim me Putinin në Rusi ose Bjellorusi.