Influenca Aviare e tipit H5N8 dyshohet se është përhapur edhe në fshatin Grabian të Lushnjes, ku këtë të martë raportohet se kanë ngordhur 60 pula. Veterineri ka shkuar në fermë për të marrë kampione që do të dërgohen për analiza në Institutin e Sigurisë Ushqimore dhe Veterinare në Tiranë, ndërsa pritet të dalë rezultati për të vërtetuar, nëse këto pula janë prekur apo jo nga gripi i shpendëve. Në Durrës ngordhën 500 mijë pula, ndërsa groposja e tyre u bë gjatë mesnatës së të hënës. Shpendët kishin 5 ditë që kishin ngordhur, ndërsa procesi i groposjes u bë pas 5 ditësh, duke shtuar rrezikun e përhpajes së infeksionit. Nga ana tjetër, gripi i shpendëve u konfirmua këtë të martë edhe në liqenin e Prespës, ku tre pelikanë u gjetën të ngordhur në anën shqiptare të liqenit dhe më shumë se 570 në anën greke. Mesa duket, përhapja e këtij virusi, nuk po kufizohet dot, duke u shtrirë kështu në disa zona të vendit, e duke prekur disa lloje shpendësh.