Instituti Kombëtar i Shëndetësisë Publike ne Kosove ka njoftuar se gjatë 24 orëve të fundit janë regjistruar 514 raste të reja me koronavirus. Kjo është shifra më e lartë e infektimeve brenda një dite që është regjistruar në Kosovë, që kur u paraqitën rastet e para me koronavirus më 13 mars. IKSHPK-ja thotë se rastet e reja dalin pas testimit të 1,750 mostrave. Gjatë 24 orëve të fundit janë raportuar edhe tre viktima të koronavirusit që e con numrin total në 681. Për shkak të rritjes së rasteve me koronavirus, Ministria e Shëndetësisë e Kosovës, më herët gjatë ditës njoftoi për masa të reja kundër koronavirusit. Ndër masat e reja janë kufizimi i veprimtarisë së qendrave tregtare dhe sektorit të gastronomisë nga ora 21:00 deri në orën 05:00. Po ashtu, personat mbi 65 vjeç do të kenë orar të caktuar për lëvizjet. Ata mund të dalin nga ora 06:00 deri në orën 10:00 si dhe nga ora 16:00 deri në ora 19:00. Po ashtu, Zemaj tha se është rekomanduar që të reduktohet stafi në institucionet publike dhe private si në nivelin qendror, po ashtu edhe atë lokal. Vetëm sektori i shëndetësisë dhe sigurisë do të punojë me kapacitete të plota. Personat me sëmundje kronike dhe ata mbi moshën 60-vjeçare do të lejohen të mos paraqiten në punë dhe të punojnë nga shtëpia. Kosova do të shtojë kontrollet në kalimet kufitare, ndërkaq, sipas Zemajt, qytetarët e infektuar me koronavirus, duhet të mbikëqyren nga autoritetet në një periudhë prej dyjavësh. Ministri i Shëndetësisë, Armend Zemaj tha se masat e reja do të rishqyrtohen pas dy javësh në varësi të situatës epidemiologjike.