Dronët policorë të Guardia di Financa prej disa orësh ishin në një operacion masiv antikanabis, ku më shumë se 200 efektivë të RENEA-s dhe Forca të Ndërhyrjes së Shpejtë po vijojnë kontrollet për të zbuluar parcelat me bimë narkotike. Përmasat e këtij operacioni mund të krahasohen me kontrollet masive të kryera në Lazarat 7 vite më parë. Mësohet se 10 persona janë shoqëruar nga policia dhe disa të tjerë janë marrë në pyetje, në lidhje me kultivimin e hashashit në zonën e Niklës në Krujë. Më shumë se dhjetë parcela të mbjella kanë bërë të mundur kamuflimin e bimëve narkotike, kjo pasi bimët kanë qenë mjaftushëm të rritura, për të fshehur zhvillimin e aktivitetit të jashtëligjshëm. Në këtë mënyrë janë krijuar të ashtuqujturat ‘shtëpi bari’, sepse në shumicën e rasteve mbilleshin në oborre, të ngjashme me sera perimesh. Sasia e bimëve narkotike të sekuestruara dhe asgjësuara nuk është bërë ende publike, por dyshohet se nisur nga përmasat e këtij operacioni, ka qenë e konsiderueshme. Në operacion ka qenë edhe drejtori i Përgjithshëm i Policisë, Ardi Veliu dhe drejtori i Policisë Kriminale Tonin Vocaj, të cilët organizuan në terren të gjithë ndërhyrjet policore. Mega opeacioni policor ka filluar rreth orës 03.30 të mëngjesit të kësaj të shtune dhe pritet të vazhdojë deri në fundjavën e ardhshme, duke pasur informacion edhe për zona të tjera, në të cilët është mblellë kanabis me shumicë.