Qeveria e Kosovës ofron 20 mijë euro shpërblim për secilin qytetar që jep informacione për autorin apo autorët e vrasjes së trefishtë në Deçan. Policia e Kosovës me të gjitha njësitë e saj është angazhuar në hetimin dhe ndriçimin sa më parë të këtij rasti. Policia është duke punuar në mbledhjen dhe analizimin e të gjitha fakteve dhe dëshmive për të zbardhur sa më parë këtë rast dhe për të sjellë para drejtësisë sa më parë që të jetë e mundur autorin e kësaj vepre të rëndë penale. Sipas Policië, për identifikimin sa më të shpejtë të vrasësit, apo vrasësve, Qeveria, Ministria e Punëve të Brendshme dhe Policia kërkojnë ndihmën e qytetarëve dhe kujtdo që mund të ketë informacione të rëndësishme për zbardhjen e rastit. Kryeministri Albin Kurti, bashkë me Ministrin e Punëve të Brendshme dhe Policinë e Kosovës apelojmë te qytetarët që mund të kenë ndonjë njohuri rreth rastit ta ndihmojnë policinë me informacione për gjetjen e autorit, apo autorëve dhe për këtë ofrojnë një shpërblim prej 20.000 euro, për cilindo qytetar, i cili mund të japë informacione të cilat çojnë në zbardhjen e vrasësit. Për qytetarët është vënë në dispozicion edhe një numër telefoni, ndërsa garantohet anonimati i plotë.