Dy shpërthime me lëndë plasëse kanë tronditur Shkodrën në orët e para të mëngjesit të kësaj të shtune. Shpërthimet janë regjistruar në dy zona të ndryshme të qytetit në një distancë pak më shumë se 1 km nga njëra tjetra dhe në një distancë kohore rreth 10 minuta. Shpërthimi i parë është dëgjuar rreth orës 02:20 në një supermarket në pronësi të biznesmenit Florenc Marku në lagjen " Kongresi i Permetit" dhe vetëm pas 10 minutash është dëgjuar edhe shpërthimi tjetër në një dyqan rrobash në pronësi të ish kandidatit të PD për kryetar bashkie të Shkodrës, Xhemal Bushati në lagjen ‘Vasil Shanto’. Fatmirësisht nga shpërthimet me lëndë plasëse ka patur vetëm dëme materiale.