Një vatër zjarri është regjistruar buzë lumit Shkumbin, në territor jashtë zonës së ish-Kombinatit Metalurgjik në Elbasan. Sipas informacionit paraprak, bëhet fjalë për djegie gomash në ambient të hapur, e cila ka shkaktuar shtëllunga tymi dhe shqetësim tek banorët përreth. Korrespondentja e Top Channel Bruna Kërçyku, bën me dije se autoritetet sqarojnë se kjo ngjarje nuk ka lidhje me aktivitet në territorin e ish-Kombinatit Metalurgjik. Shërbimi zjarrfikës ka ndërhyrë menjëherë në vendngjarje dhe po punon për shuarjen e plotë të flakëve dhe vënien nën kontroll të situatës. Ndërkohë, strukturat e Policisë së Shtetit kanë nisur hetimet për identifikimin e autorëve dhe zbardhjen e plotë të rrethanave të kësaj ngjarjeje. Autoritetet u bëjnë thirrje qytetarëve të shmangin zonën për arsye sigurie, ndërsa vijon puna për normalizimin e situatës.