Ndërsa presidentët Donald Trump dhe Vladimir Putin filluan samitin e tyre në Alaska të përqendruar në përfundimin e luftës së Rusisë ndaj Ukrainës, presidenti ukrainas, Volodymyr Zelenskyy, reagoi nga Kievi, duke thënë se rusët po vijojnë sulmet vdekjeprurëse, ndërsa shtoi se kërkesa “numër një” e Ukrainës në samitin e Alaskës është që Rusia të bjerë dakord për një armëpushim. “Rusët vijojnë të vrasin dhe në ditën e negociatave, kjo tregon shumë”, u shpreh Zelensky në një postim në X, i cili renditi një listë të sulmeve të fundit nga rusët në Ukrainë. “Sumy – një sulm rus në tregun qendror. Rajoni i Dnipros – sulme në qytete dhe ndërmarrje. Zaporizhzhia, rajoni i Khersonit, rajoni i Donetskut – sulme të qëllimshme ruse. Lufta vazhdon dhe pikërisht sepse nuk ka as një urdhër dhe as një sinjal se Moska po përgatitet t’i japë fund kësaj lufte. Rusia duhet t’i japë fund luftës që e filloi vetë dhe që e ka zvarritur prej vitesh. Vrasjet duhet të ndalen. Nevojitet një takim i udhëheqësve – të paktën, i Ukrainës, Amerikës dhe palës ruse – dhe pikërisht në një format të tillë janë të mundura vendime efektive. Nevojiten garanci sigurie. Nevojitet paqe e qëndrueshme”, tha presidenti i Ukrainës. Agresioni rus në Ukrainë vijon prej më shumë se tre vitesh, duke shkaktuar mijëra viktima e shkatërrime masive në të dyja vendet.