Top Channel/ Yuri Kim, njeriu i vitit 2021/ Ambasadorja amerikanë është më e votuara mes shqiptarëve

Ambasadorja Yuri Kim është personazhi më i votuar nga shqiptarët për vitin 2021. Arsyet se përse këtë vit është zgjedhur ambasadorja amerikane janë të shumta, por ne do t’ju rendisim disa prej tyre. Në 2021 u mbushën 30 vite nga rivendosja e marrëdhënieve me Shtetet e Bashkuara të Amerikës. Shtetet e Bashkuara kanë qenë mbrojtës të Shqipërisë që në krijimin e shtetit shqiptar dhe pa përfshirjen e SHBA-së, Shqipëria nuk do të ishte kjo që është sot. Kryefjalë e gjithë përpjekjes 30-vjeçare amerikane, përmes ambasadorëve, ka qenë pasja e një demokracie funksionale. Ndërkohë, dhjetë vitet e fundit, prioritet është jo vetëm çrrënjosja e korrupsionit, por edhe dhënia fund e mbretërimit të të pandëshkuarve.