Presidenti i Serbisë, Aleksandër Vuçiç u takua të mërkurën me përfaqësuesin e dialogut Kosovë-Serbi, Mirosllav Lajçak. Takimin e njoftoi në llogarinë e tij në Instagram, presidenti serb, ndërsa në fokus ishin zhvillimet në veri të Kosovës. Vuçiç tha se I shprehu Lajçak të gjitha shqetësimet për ngjarjet e ndodhura së fundmi në komunat me shumicë serbe në Kosovë por pa dhënë shumë detaje. Vizita në Beograd e Lajçak vjen fill pas takimit të zhvilluar më 28 gusht me kryeministrin e Kosovës Albin Kurti në samitin e Bledit në Slloveni ku diskutoi për përgatitjet e nisjes së dialogut në nivel të lartë mes Prishtinës dhe Beogradit që pritet të mbahet në muajin shtator. Por teksa Beogradi është I shqetësuar, Bashkimi Europian përsëriti edhe njëherë qëndrimin se të dy vendet duhet të sillen në mënyrë të përgjegjshme dhe menjëherë të angazhohen në dialog për të gjetur një zgjidhje të qëndrueshme për situatën në veri të Kosovës dhe të bëjnë hapa drejt zbatimit të Marrëveshjes në rrugën drejt normalizimit të raporteve të arritur në Bruksel më 27 shkurt. Tensionet në veri të Kosovës nisën në fund të majit, kur kryetarët e rinj shqiptarë hynë në ndërtesat komunale me asistimin e Policisë së Kosovës. Që atëherë, BE-ja dhe Shtetet e Bashkuara kanë kërkuar nga Kosova dhe Serbia të ulin tensionet dhe t’i kthehen dialogut. Për shkak të mos përmbushjes së kërkesave të BE-së, blloku evropian ka vendosur disa masa ndëshkuese ndaj Kosovës. Ndërkohë Kurti dhe Vuçiç janë takuar për herë të fundit më 2 Maj. Pamjet: AFP