Pesë gazetarë dhe një pjesëtar i Mbrojtjes civile u vranë këtë të hënë nga sulmet izraelite në Gaza. Lajmi u konfirmua nga Agjencia e Gazës për Mbrojtje Civile, sipas të cilës, ushtria izraelite sulmoi një spital në jug, duke vrarë të paktën 20 persona. Agjencitë Reuters, Associated Press dhe televizioni Al Jazeera kanë konfirmuar se në mesin e të vrarëve janë gazetarë që kanë kontribuuar për këto media. Sipas vëzhguesve të mediave, rreth 200 gazetarë janë vrarë përgjatë dy viteve të luftës mes Izraelit dhe Hamasit – grupit palestinez të shpallur terrorist nga Shtetet e Bashkuara dhe fuqi tjera. Ushtria izraelite ka konfirmuar se trupat e saj ushtarake kanë kryer sulme në zonën e spitalit në jug të Gazës. “Shefi i shtabit të përgjithshëm urdhëroi që të kryhet hetim fillestar sa më shpejt që është e mundur”, ka thënë ushtria përmes një deklarate, duke shtuar se “ndjen keqardhje për dëmet ndaj individëve të papërfshirë" dhe që "nuk i shënjestron gazetarët”.