Dhjetë ushtarë izraelitë humbën jetën të mërkurën gjatë luftimeve me grupin radikal të Hamas. Nëntë prej ushtarëve sipas njoftimit të ushtrisë u vranë në një pritë. Mes viktimave pati dhe kolonel dhe oficer të lartë. Luftimet po vijojnë pothuajse në pjesën më të madhe të Gazës, ku më të ashprat ishin në Shiaja, një lagje e mbipopulluar dhe që në vitin 2014 u shndërrua po në një fushëbetejë luftimesh mes Izraelit dhe Hamas. Ndërkohë pjesa më e madhe e civilëve palestinezë kanë braktisur banesat dhe janë zhvendosur drejt zonave periferike, Më shumë se 250 sulme u ndërmorën nga forcat ushtarake të Izraelit nga toka dhe ajri gjatë orëve të fundit. Si pasojë e të cilave raportohet se u vranë të paktën 50 persona në radhët e palestinezëve, sipas raportit të Ministrisë së Shëndetësisë të drejtuar nga Hamas. Nga bombardimet u shkatërrua dhe një pjesë e infrastrukturës së grupit terrorist. Ushtria izraelite, sipas BBC, raportoi se gjatë operacioni bëri disa arrestime si dhe ushtroi kontrolle në të paktën 400 ndërtesa. Pamjet: AFP