Melania Trump nuk udhëtoi drejt Alaskës për samitin e shumëmediatizuar të bashkëshortit të saj dhe Vladimir Putin. Megjithatë, Zonja e Parë e Amerikës i ka dërguar shefit të Kremlinit një letër, të cilën homologut rus ia ka dorëzuar vetë Shefi i Shtëpisë së Bardhë. Përmbajtja e plotë e mesazhit nuk është bërë e ditur nga zyrtarët amerikanë. Megjithatë, mediat e huaja flasin për një mesazh jo fort lavdërues për presidentin rus, pasi në të përmendej cështja delikate e rrëmbimit të fëmijëve ukrainas nga trupat ruse. Teksa republikani vetë dukej më i pritur të respektonte homologun, e shoqja e tij duket ka rivendosur balancat, me këtë mesazh të fortë të saj, i cili thuhet se përshkruan gjendjen e vështirë të këtyre të miturve. Sipas Kievit zyrtar, dhjetëra mijëra fëmijë janë marrë me forcë nga prindërit ose kujdestarët ligjorë dhe janë dërguar në Rusi apo në territoret e pushtuara. Një veprim i tillë kualifikohet si krim lufte e madje, sipas traktateve të OKB-së mund të përbëjë dhe një formë genocidi. Moska vetë megjithatë nuk e pranon akuzë dhe insiston se është duke mbrojtur “fëmijët e pambrojtur që vijnë nga zonat e luftës”, pretendim ky që hidhet poshtë nga Perëndimi si i rremë. Ka bërë xhiton e botës sakaq videoja që tregon sesi avioni Ilushin me të cilin ka udhëtuar Putin pas samitit, është shoqëruar nga bombardues amerikanë F35 Lightning, të gjeneratës së fundit. Videoja është filmuar nga brenda avionit presidencial rus, ndërsa pamjet u publikuan nga vetë Kremlini, që sqaroi se shoqërimi nga F35-sat amerikanë është bërë për arsye sigurie…