Shtetet e Bashkuara të Amerikës do të vazhdojnë sulmet ndaj Iranit. Duke folur me gazetarët në Zyrën Ovale, Presidenti amerikan, Donald Trump, paralajmëroi sulm më të fuqishëm, duke akuzuar Teheranin se po zvarrit negociatat për marrëveshjen bërthamore. “Ne i goditëm fort dje dhe do t’i godasim përsëri fort sot. Irani mendoi se ne ishim budallenj. U dhashë më shumë kohë për të arritur një marrëveshje, por ata vazhdojnë të humbasin kohë. Ne ishim shumë afër një marrëveshjeje. Kam punuar me Iranin për disa muaj dhe ata duhet ta nënshkruajnë atë marrëveshje. Është një marrëveshje e mirë. Nuk u jep atyre të drejtën të kenë një armë bërthamore. Në fakt, i ndalon plotësisht ata që të kenë ndonjëherë një armë bërthamore. Lindja e Mesme duhet të sjellë paqe në të gjithë botën”. Kreu i Shtëpisë së Bardhë konfirmoi se është pranë urdhërimit të sulmeve të reja kundër Iranit. Ndërkohë, në rrjetin social Truth, ai shkroi se Irani po merr "shumë kohë" për të negociuar me SHBA-në dhe se "tani do ta paguajë çmimin". Gjithashtu, presidenti Trump zbuloi se ushtria amerikane kreu muajin e kaluar një operacion sekret për të mbrojtur cisternat e naftës dhe anijet e tjera tregtare që kalonin nëpër Ngushticën e Hormuzit, një nga korridoret më të rëndësishme detare për transportin e energjisë në botë. Sipas tij, operacioni mundësoi transportimin e më shumë se 100 milionë fuçive naftë drejt tregjeve ndërkombëtare, ndërsa mbi 200 anije tregtare kaluan në mënyrë të sigurt përmes ngushticës. Nga ana tjetër, presidenti i Iranit, Masoud Pezeshkian, iu përgjigj menjëherë Trumpit, duke thënë se "Teherani do të qëndrojë i vendosur kundër çdo presioni ose kërcënimi". Shtetet e Bashkuara të Amerikës goditën të mërkurën bazat iraniane, ndërsa Teherani nisi sulme ndaj 21 objektivave në bazat amerikane në Gjirin Persik, një në Bahrein dhe tjetra në Jordani.