Presidenti i Shteteve të Bashkuara të Amerikës, Donald Trump, dhe zyrtarët e lartë të Iranit shkëmbyen kërcënime të reja për veprime të mëtejshme ushtarake, pasi të dyja palët kryen sulme të ndërsjella. Kreu i Shtëpisë së Bardhë tha se Teherani nuk pranoi të negocionte marrëveshje në kohë dhe tani do të duhet të paguajë çmimin, pa dhënë detaje specifike. Sipas Trump, Irani është i mundur dhe tashmë ka vetëm fjalë, asnjë veprim. Reagimi i presidentit amerikan erdhi pasi ministri i Jashtëm i Iranit, Abbas Araghchi, paralajmëroi se vendi i tij nuk do të lërë asnjë sulm ose kërcënim pa përgjigje, duke thënë se “SHBA-të kishin pësuar disfatë në fushën e betejës”. Tensionet mes dy vendeve rinisën pasi iranianët rrëzuan një helikopter të ushtrisë amerikane mbi Ngushticën e Hormuzit. Vetëm pak orë pas ngjarjes, Shtetet e Bashkuara të Amerikës njoftuan se kishin goditur bazat iraniane. Sistemet iraniane të mbrojtjes, stacionet e kontrollit tokësor dhe vendet e radarit u shënjestruan pranë Ngushticës së Hormuzit, tha Komanda Qendrore e Ushtrisë Amerikane. Irani u kundërpërgjigj menjëherë me sulme mbi bazat amerikane në Gjirin Persik. Korpusi i Gardës Revolucionare Islamike tha se nisi sulme ndaj 21 objektivave në bazat amerikane në Gjirin Persik, një në Bahrein dhe tjetra në Jordani.