Ushtria iraniane provokon Shtetet e Bashkuara të Amerikës, duke rrëzuar një helikopter ushtarak amerikan mbi Ngushticën e Hormuzit. Menjëherë pas incidentit, Presidenti Donald Trump paralajmëroi hakmarrje ndaj Teheranit. “Sapo jam informuar nga ushtria jonë se iranianët rrëzuan një nga helikopterët tanë të sofistikuar, Apache, teksa po patrullonte mbi Ngushticën e Hormuzit. Kishte dy pilotë në helikopterin e ushtrisë, të dy janë të sigurt dhe të padëmtuar. Sidoqoftë, Shtetet e Bashkuara duhet, domosdoshmërisht, t'i përgjigjen këtij sulmi”. Më herët, Komanda Qendrore e SHBA-së konfirmoi se kishte ndodhur një incident ku u përfshinë dy pilotë të një helikopteri të llojit Apache, që u rrëzua afër Ngushticës së Hormuzit. “Ty anëtarë të një helikopteri AH-64 Apache të ushtrisë amerikane janë shpëtuar nga forcat amerikane pasi helikopteri u rrëzua afër brigjeve të Omanit teksa po patrullonte ujërat rajonale”, njoftoi Komanda Qendrore, duke shtuar se “shkaku i incidentit po hetohet”. Ngushtica e Hormuzit është një rrugë kyç për dërgesat botërore të naftës dhe gazit. Irani praktikisht e ka mbyllur atë për qarkullim që kur SHBA-ja dhe Izraeli nisën sulmet ajrore ndaj Republikës Islamike në fund të shkurtit. Njoftimi i Trumpit për rrëzimin e helikopterit vjen një ditë pasi Irani dhe Izraeli këmbyen sulme ajrore për herë të parë që nga armëpushimi i prillit.