Ka pasur zhvillime të reja në hetimin e rrëzimit tragjik të fluturimit Air India 171, që ndodhi më 12 qershor, pak minuta pas ngritjes nga aeroporti i Ahmedabadit. Avioni i tipit “Boeing 777 Dreamliner”, me destinacion Londrën dhe me 242 persona në bord, pësoi një defekt të papritur vetëm pesë minuta pas ngritjes, duke sjellë pasoja fatale, pasi ra në një rezidencë studentësh duke shkaktuar edhe 30 viktima të tjera. Sipas raportimeve të para që citohen nga gazeta prestigjioze Ëall Street Journal, analizat fillestare tregojnë se nuk ka pasur një defekt teknik në aeroplani. Vëmendja e hetuesve është përqendruar tani në veprimet që kanë ndodhur brenda kabinës së pilotit, pasi rezulton se çelësat që kontrollojnë rrjedhën e karburantit në të dy motorët janë çaktivizuar. Sipas protokollit pilotët përdorin çelësa për të ndezur, fikur ose rindezur motorët në disa raste urgjente, dhe tani po hetohet nëse ata u çaktivizuan aksidentalisht apo qëllimisht atë ditë, dhe nëse është tentuar një rindezje e motorëve. Ende nuk është e qartë nëse ky veprim është bërë me qëllim apo ka qenë rezultat i ndonjë gabimi njerëzor. Burime pranë hetimit kanë bërë të ditur se ky çaktivizim çoi në një humbje të menjëhershme të shtytjes, çka shpjegon pse aeroplani humbi kontrollin menjëherë pas ngritjes. Një zyrtar i aviacionit civil indian, e ka cilësuar ngjarjen si “jashtëzakonisht të rrallë”, duke theksuar se “nuk ka ndodhur më parë që të dy motorët e një “Dreamliner” të ndalen njëkohësisht”. Ndërkohë, familjarët e viktimave dhe publiku kanë ngritur shqetësime mbi transparencën e munguar dhe ritmin e ngadaltë të hetimeve, sidomos në lidhje me analizën e të dhënave të nxjerra nga kutia e zezë.