Top Channel/ Sot votimet e dyfishta në Maqedoninë e Veriut. Rëndësia e votës së shqiptarëve në balotazh

Në Maqedoninë e Veriut mbahet sot balotazhi presidencial dhe zgjedhjet parlamentare. Gati 2000 vëzhgues janë akredituar gjithsej për këto zgjedhje të konsideruara të një rëndësie kyce për vendin fqinj dhe kursin që ai do të ndjekë në vijim. Votimet që nisin në orën 7 të mëngjesit do ti ndjekin 770 moniturues të huaj për nevojat e të cilëve janë angazhuar 85 përkthyes. Në garën për president janë dy kandidatë, fituesja e rundit të parë, Gordana Silanovska-Davkova që fitoi 363.000 vota dhe presidenti aktual, Stevo Pendarovski, me 180 mijë vota. Vota e shqiptarëve pritet të ketë rëndësi kyce në këto zgjedhje: VMRO-DPMNE-ja me qëndrime nacionaliste shihet si partia me gjasa të mëdha për t’i fituar zgjedhjet, e po kështu edhe kandidatja e kësaj force. Megjithatë, që të zgjidhet presidenti i ri, në zgjedhje duhet të dalin rreth 750.000 votues. BDI-ja publikisht nuk ka dalë me qëndrim nëse do të mbështesë ndonjërin kandidat në balotazh, por eksponentë të saj, në rrjetet sociale në vazhdimësi kanë bërë thirrje që më 8 maj të bojkotohen zgjedhjet presidenciale. Partitë qeveritare LSDM dhe BDI, secila me koalicionet e tyre veç e veç kanë për moto vazhdimin e rrugës europiane, ndërsa BDI-ja ka vënë theksin, sidomos tek rreziku nga ndikimi rus dhe rënien pré të opozitës shqiptare ndaj këtij ndikimi. BDI-ja arriti të bashkojë rreth koalicionit të quajtur “Fronti Evropian” përfaqësues politikë që për vite të tëra sulmoheshin dhe nuk komunikonin mes tyre, por akti i bashkimit duket se u mirëprit nga shqiptarët dhe nga ana tjetër, edhe bashkimi i opozitës shqiptare të njohur me emrin “VLEN”, sipas analistëve, “nuk do të çojnë dëm” votën e elektoratit shqiptar. Pamjet: AFP