Ndërsa në vendin tonë që prej së hënës do të nisë për 6 javë regjistrimi i popullsisë, lajmi ka bërë jehonë edhe në vendet fqinje. Duke qenë se në censin e popullsisë qytetarët janë të lirshëm të shprehin përkatësinë e tyre etnike, gjuhësore dhe fetare në përputhje me ligjin, Ministria e Punëve të Jashtme e Maqedonisë së Veriut inkurajon të gjithë maqedonasit në Shqipëri që të shprehin lirisht përkatësinë e tyre. “Shqipëria njihet në botë për shoqërinë e saj multietnike dhe multikulturore, në mënyrën se si u arrit në Maqedoninë e Veriut dhe që përfaqëson një trashëgimi autentike të paçmuar politike dhe kulturore. Duke e njohur rolin e maqedonasve si qytetarë lojale të Shqipërisë, regjistrimi i ardhshëm do t’u mundësojë atyre, përmes shprehjes së lirë të identitetit të tyre, të konfirmojnë përkatësinë e tyre etnike, gjuhësore, fetare dhe identitare. Kjo do të konfirmojë edhe më shumë rolin e komunitetit etnik maqedonas në Shqipëri, në ndërtimin e urave të miqësisë mes dy vendeve”, thuhet në deklaratën e Ministrisë së Punëve të Jashtme. Në deklaratën e diplomacisë së vendit fqinj theksohet se “Maqedonia e Veriut dhe Shqipëria janë vende me marrëdhënie miqësore të jashtëzakonshme” dhe se “do të qëndrojnë në komunikim intensiv me përfaqësuesit e bashkësisë etnike maqedonase në Shqipëri, si dhe me institucionet e Republikës së Shqipërisë, ndër të tjera, për çështje që prekin çështjet e identitetit”. “Vazhdojmë të angazhohemi në mënyrë aktive në mbrojtjen dhe promovimin e këtyre të drejtave në të njëjtën mënyrë siç kemi bërë deri më tani”, mbyllet deklarata.