Sylvinho humbet edhe kapitenin Gjimshitin që në seancën e parë stërvitore në Tiranë. Në ditën e parë të grumbullimit thuajse të plotë të kombëtares kuqezi, vijnë lajme jo të mira për trajnerin Sylvinho. Në ndeshjen e kontrollit të zhvilluar mes lojtarëve të skuadrës që ishin të pranishëm në “Shtëpinë e Futbollit”, është dëmtuar kapiteni Berat Gjimshiti. Flitet për një tërheqje muskulare nga burime brenda skuadrës, duke qenë se gjithçka në këtë seancë stërvitore ka qenë me dyer të mbyllura, përveç 15 minutave të para të nxehmjes. Në vend të tij trajneri Sylvinho ka thërritur mbrojtësin e kombëtares U21, që ndodhet gjithashtu në grumbullim për ndeshjet e sajë, Adrian Bajramin, 22-vjeçarin që aktivizohet tek Benfika B në kampionatin portugez. Nuk dihet ende se sa do të zgjasë ky dëmtim i kapitenit, por që nga shenjat e para duket se kapiteni kuqezi dhe futbollisti i Atalantës mund të humbasë ndeshjen e parë të Ligës së Kombeve atë përballë Ukrainës më 7 shtator ndërkohë që nuk dihet nëse do të jetë në gjendje për të qenë i gatshëm në ndeshjen e dytë, atë ndaj Gjeorgjisë më 10 shtator në Tiranë. Ndërkohë që ky grumbullim ka pasur disa ndryshime edhe për shkak dëmtimesh por edhe për zgjedhje të trajnerit. Kështu në këto ndeshje të para do të mungojë edhe Armando Broja, i zëvendësuar ditën e diel nga Myrto Uzuni i cili pritet të martën të mbërrijë në Tiranë. Gjithashtu në repartin e sulmit nuk është as Ernest Muçi i lënë jashtë për zgjedhje teknike, ashtu si edhe Kejdi Bare në mesfushë, apo portieri Etrit Berisha që mbeti jashtë grumbullimit për shkak se nuk ka ende një skuadër. Në pritje për të mbërritur tek grupi janë Enea Mihaj që pritet të vij të martën sëbashku me Mario Mitajn, i cili është në prag të ndryshimit të klubit dhe i është dhënë leje për përfundimin e dokumentacioneve. Mes të fundit lojtarëve që mbërrin është edhe Jasir Asani i cili udhëton nga Kore e Jugut.