Ambasadori i Shteteve të Bashkuara të Amerikës në Kosovë, Jeff Hovenier, ka reaguar në lidhje me shpërthimin e një granate në “Lagjen e Boshnjakëve” në veri të Mitrovicës. Ai është shprehur i tronditur pas ngjarjes, teksa kërkon një hetim të plotë për zbardhjen e plotë të aktit të kryer. “I tronditur thellë kur lexova raportet e mjeteve shpërthyese të përdorura në shumë pjesë të Kosovës. Ne i dënojmë këto akte dhune dhe u bëjmë thirrje autoriteteve të kryejnë hetim të plotë dhe të nxjerrin autorët para drejtësisë”, ka shkruar ambasadori amerikan në platformën “X”. Gjatë paradites së sotme nuk mungoi as reagimi i ministrit të Punëve të Brendshme të Kosovës, Xhelal Sveçla. Sipas tij grupet kriminale kanë gjuajtur me granatë dore, si shenjë revolte ndaj arrestimit të tre serbëve për krime të kryera ndaj popullatës civile në Kosovë. “Krimet e kryera gjatë luftës në Kosovë do të ndiqen deri në fund ndërsa hedhja e granatës ushtarake të dorës nga grupet kriminale nuk mund të zmbrapsë drejtësinë”, tha Sveçla. Në raportin e Policisë së Kosovës theksohej se shpërthimi i granatës, i raportuar në orën 22:40 nuk shkaktoi të lënduar, por vetëm dëme materiale. Ministri ndër të tjera ka raportuar se mbështetja dhe urdhri i kanë ardhur autorëve nga presidenti i Serbisë, Aleksandar Vuçiç. Ndër të tjera ai pretendon se në dyshimet e para autorët kanë qenë bashkëpunëtorë në tortura, plagosje, vrasje, dëbim, dhe masakra ndaj shqiptarëve në Vushtrri, fshatrat e saj përreth dhe në Burgun e Smrekovnicës.