Top Channel/ Serbët bojkotojnë zgjedhjet/Kosovë,pjesëmarrje e ulët dhe masa të larta sigurie në veri

Kosova zhvilloi këtë të diel zgjedhjet lokale në katër komunat me shumicë serbe në veri të vendit, Mitrovicë e Veriut, Zubin Potok, Zveçan dhe Leposaviç. Që në orën 7 të mëngjesit të së dielës qendrat u hapën për votuesit. Me pak vonesa edhe ato alternative iu përmbajtën orarit të përcaktuar nga institucionet e zgjedhjeve. Megjithatë, disa prej tyre nuk pritën asnjë votues, dy prej të cilave ishin në komunën e Zubin Potokut. Në qendrën e votimit në Velje Breg në rrugën Mitrovicë-Bërnjak kanë të drejtë vote 4111 qytetarë, të gjithë të nacionalitetit serb, megjithatë, asnjë prej tyre nuk e ka ushtruar të drejtën e votës. Situatë pak më pozitive ishte në Leposaviq e në Zveçan që kishin numër simbolik të votuesve serbë. Edhe në qendrën e votimit në rrugën Mitrovicë- Jarinjë në dalje të fshatit Soqanicë ka pak votues. Mbi tre mijë janë të regjistruar për të votuar, por vetëm dy e kanë bërë këtë gjatë ditës së diel. Një prej votuesve në Zveçan ishte vetë kandidatja për kryetare të komunës, Sllagjana PantovIç e cila erdhi e u përcoll për në shtëpinë e saj me një eskortë të policisë së Kosovës, të cilët gjatë ditës monitoruan situatën pranë vendbanimit të saj. Pantoviç kërkoi paqe me shpresën që këto zgjedhje do sjellin ndryshimin. “Mendoj se zgjedhjet po mbahen dhe duhet të mbahen në paqe, në dashuri dhe respekt për popullin dhe jo me urrejtje, kërcënime dhe shantazhe”, tha Sllagjana Pantoviç, kandidate për kryetare të Komunës së Zveçanit.