Rusia thotë se do të përfshijë në votimet për zgjedhjet presidenciale edhe katër rajonet ukrainase që Kremlini pretendon se i ka aneksuar. Komisioni qendror I zgjedhjeve, sipas agjencisë shtetërore të lajmeve TASS, njoftoi se zgjedhjet do të zhvillohen edhe në Donjeck, Luhansk, Zaporizhja dhe Herson. Vendimi sipas autoriteteve ruse është miratuar në mënyrë unanime. Edhe në këto zgjedhje që do të mbahen në muajin mars dhe që do të zgjasin tre ditë, nga data 15 deri më 17 mars, pritet të fitojë presidenti aktual Vladimir Putin. Ndërkohë kritikët e Kremlinit vijojnë të pretendojnë se dhe në këto zgjedhje transparenca do të mungojë. Kjo pasi dhe vetë kandidatët me të cilët do të përballet Putin nuk do të jenë të fortë për të përmbysur rezultatin. Kjo pasi shumica e opozitarëve dhe kundërshtarëve të Putin ose janë burgosur ose janë dëbuar nga vendi. Deri më tani, pesë parti janë lejuar që të bëhen pjesë e garës zgjedhore të vitit 2024. Të gjitha këto subjekte janë nga radhët e kahut që mbështesin Kremlinin dhe luftën në Ukrainë. Ndërkohë nga ana tjetër Kievi, I ka bërë thirrje komunitetit ndërkombëtar që të dënojë përmes një rezolute qëllimet e Rusisë. Ky është mandati I pestë që Vladimir Putin pritet të fitojë si president. Pamjet: AFP