Pjesë e delegacionit të Kremlinit në takimin e Alaskës, ministri i jashtëm rus Sergei Lavrov u shfaq me një shkrim në bluzën e tij të bardhë, që u interpretua shumë shpejt si një lloj mesazhi i fshehtë që shefi i diplomacisë ruse po përpiqet të përcjellë përpara ngjarjes së shumëpritur. Edhe pse e fshehur poshtë një jeleku të zi, bluza e bardhë me shkronjat "CCCP" , që është versioni rus i akronimit për Bashkimin Sovjetik, nuk i shpëtoi syrit të gazetarëve. Regjimi aktual rus e ka shfrytëzuar vazhdimisht nostalgjinë e BRSS-së për të ndjekur qëllimet e tij politike dhe perandorake, sipas ekspertëve, teksa Vladimir Putini vetë e cilësoi publikisht në 2005-tën shpërbërjen e Bashkimit Sovjetik si "katastrofën më të madhe politike" të shekullit të 20-të. Nostalgjia e Moskës për të kaluarën është lidhur gjithashtu shpesh me pushtimin e saj në shkallë të plotë të Ukrainës në vitin 2022 dhe luftën që Trump shpreson ta përfundojë në Alaskë sot. Përpara se të merrej me politikë, vetë Putini ka punuar për KGB-në – agjensinë e famshme sovjetike të inteligjencës - duke shërbyer si oficer i nivelit të mesëm në Dresden në vitet 1980, kur qyteti ishte asokohe pjesë e Gjermanisë Lindore të sunduar nga komunistët. Kievi dhe aleatët e tij druhen se Putini mund të përdorë metodat që mësoi gjatë asaj kohe për të ndryshuar mënyrën e të menduarit të Trumpit - i cili në javët e fundit ka shfqur tohne më të ashpra me Moskën – dhe që paraprakisht, ka vlerësuar se takimi me Putinin në Alaskë ka 25 përqind shanse për dështim.