Ambasadori amerikan në Paris, Charles Kushner, është thirrur për sqarime pasi i dërgoi një letër presidentit Emmanuel Macron, ku pretendonte se Franca nuk po bën mjaftueshëm për ta luftuar antisemitizmin. Ishte shefi i diplomacisë franceze ai që njoftoi se Kushnerit i është kërkuar të paraqitet sot në Ministrinë e Punëve të Jashtme, ndërsa insistoi se akuzat e tij “janë të papranueshme.” Zëdhënësi i Departamentit amerikan të Shtetit, Tommy Pigott, pohoi mbrëmjen e së dielës se i mbështet komentet e kreut te misionit diplomatic të SHBA-së, duke shtuar : “Ambasadori Kushner është përfaqësuesi ynë i Qeverisë amerikane në Francë dhe po bën një punë të shkëlqyer në avancimin e interesave tona kombëtare në atë rol”. Thirrja e ambasadorit konsiderohet si shprehje zyrtare dhe publike e pakënaqësisë. Charles Kushneri është babai i dhëndrit të presidentit Donald Trump, Jared Kushner. Ministria e Jashtme e Francës, në deklaratën e saj, tha se “Franca i hedh poshtë akuzat” nga Kushneri dhe se autoritetet franceze janë “plotësisht të mobilizuara” për të luftuar rritjen e akteve të antisemitizmit që nga sulmi i Hamasit në Izraelin më 7 tetor 2023, duke i cilësuar këto akte si “të patolerueshme.” Në letrën e publikuar vonë të dielën, Kushner shkruante se “deklaratat publike që qortojnë Izraelin dhe gjestet drejt njohjes së shtetit palestinez u japin guxim ekstremistëve, nxisin dhunë dhe rrezikojnë jetën hebraike në Francë”. Më tej, ambasadori i bënte thirrje Macronit “të veprojë me vendosmëri: t’i zbatojë ligjet kundër krimeve të urrejtjes pa përjashtim, të sigurojë mbrojtjen e shkollave hebraike, sinagogave dhe bizneseve … dhe të heqë dorë nga hapat që i japin legjitimitet Hamasit dhe aleatëve të tij”. Sipas ministrisë së jashtme franceze megjithatë, akuzat e Kushnerit shkelin të drejtën ndërkombëtare dhe detyrimin për të mos ndërhyrë në punët e brendshme të një vendi tjetër.