Rreth 30 banesa janë kontrolluar në të gjithë vendin në Tiranë, Fier, Vlorë, Elbasan, Lezhë dhe Shkodër si dhe 27 persona janë shoqëruar për llogari të ngjarjes së rëndë të ndodhur në Memaliaj. Funksionarë të lartë të policisë kanë qenë në vendngjarje dhe po ndjekin nga afër operacionin për kapjen e autorëve. Policitë e tri qarqeve vijojnë të jenë në gadishmëri me postbllokë në terren ndërsa po ekzaminohen provat materiale që lidhen me automjetin dhe armët e përdorura nga vrasësit. Nga hetimet mësohet se automjeti i përdorur ishte me targa gjermane dhe është kërkuar edhe ndihma e policisë gjermane për identifikimin e tij. Gjithë hetimet janë përqëndruar në pistën e hakmarrjes, një vrasje me pagesë e porositur për të goditur vëllezërit Kalemi. Policia bën me dije se po vijon marrja në pyetje e familjarëve të Shyqo Kalemit. Djemtë e tij janë pyetur disa herë deri tani ndërkohë që sot pas ceremonisë së varrimit të 74 vjeçarit pritet që të pyeten edhe persona të tjerë të familjes. Banorët tregojnë se frika e një atentati të mundshëm duket se ekzistonte pasi familja Kalemi kishte marrë masa për të blinduar banesën dhe asnjë nga djemtë nuk shihej në qarkullim prej kohësh. Ndërkohë ceremonitë e varrimit të Marsel Çelës dhe Gledio Mukës miq mes tyre kanë mbledhur në Memaliaj qindra banorë. Familjarë të 36 vjeçarit që shërbente si kamarier në lokal prej gati një viti thanë se janë të dëshpëruar dhe se kërkojnë drejtësi.