Kombëtarja shqiptare ka mbërritur pasditen e së martës në Marbeja ku mbrëmjen e së mërkurës do të zhvillojë një tjetër ndeshje miqësore këtë herë me organizatorët dhe skuadrën që do të çelë kampionatin botëror, Katarin. Pas një udhëtimi prej mëse 4 orësh e 30 minuta kuqezinjtë fluturuan nga aeroporti i Rinasit për në Malaga e më pas me autobus për rreth 40 minuta për të mbërritur dhe akomoduar në hotel. Pasditen e së hënës kuqezinjtë kanë zhvilluar seancën e fundit stërvitore përpara ndeshjes së mbrëmjes së nesërme. Në këtë seancë që ka zgjatur rreth 75 minuta kanë marrë pjesë që të gjithë futbollistët dhe trajneri Reja është fokusuar vetëm në aspektin taktik, duke provuar vendosje të ndryshme taktike në fushë. Grupi është shfaqur në formë të mirë dhe nuk ka probleme fizike për asnjë nga lojtarët e grumbulluar. Ashtu si me Arabinë Saudite edhe këtë herë në dispozicion të trajnerit Edi Reja është një ekip B me lojtarë të kampionatit shqiptarë të kategorisë Superiore ku do të testohen lojtarë që mund të jenë të vlefshëm edhe për ndeshjet zyrtare. Ndërkohë qe po si në ndeshjen me Arabinë Saudite në Abu Dhabi edhe ky takim nga skuadra që e organizon Katari, është kërkuar të mos transmetohet e xhirohet duke qenë se testi i tyre është për ndeshjet e eliminatoreve të Botërorit.