Barrikdat duket se nuk janë i vetmi problem në veri të kosovës, pasi prej ditësh mediat lokale raportojnë për raste të njëpasnjëshme të rrëmbimit të qytetarëve nga komuniteti serb. Për këto pretendime ka reaguar të mërkurën edhe policia e Kosovës duke thënë po kryen hetimet e nevojshme lidhur me informacionet e publikuara. Policia tha se është duke i trajtuar këto raste me “seriozitet”. “Ditëve të kaluara ka pasur informacione, raportime dhe publikime në media lidhur me rrëmbimin, rrahjen dhe keqtrajtimin e disa qytetarëve serbë nga pjesëtarë të strukturave kriminale në pjesën veriore të Republikës së Kosovës” thuhet në njoftimin e Policisë së Kosovës. Policia megjithatë nuk bëri të ditur se sa persona dyshohet se janë rrëmbyer apo të keqtrajtuar dhe kur kanë ndodhur këto incidente. Por forcat e rendit thanë se tensionet në veriun e Kosovës, të banuar me shumicë serbe, kërkojnë ngritjen e kapaciteteve policore për të menaxhuar situatën e sigurisë dhe për të parandaluar “aktivitetet kriminale”. Në veri të Kosovës, tensionet janë rritur që nga fillimi i dhjetorit, teksa janë regjistruar disa incidente me armë zjarri, granata dore dhe shok bomba. Ngritja e barrikadave nga ana tjetër u bë në shenjë pakënaqësie me arrestimin e ish-policit serb, Dejan Pantiç. Autoritetet në Kosovë dyshojnë se ai ka organizuar sulmin e 6 dhjetorit ndaj zyrave të Komisionit Qendror të Zgjedhjeve në veri.