Rritja e çmimeve të karburanteve ka shqetësuar biznesin, i cili kërkon ndërhyrje të menjëhershme nga qeveria, duke paralajmëruar pasoja zinxhir për ekonominë dhe qytetarët. Përmes një deklarate të përbashkët, 12 organizata biznesi në Shqipëri dhe rajon kanë paraqitur gjashtë kërkesa konkrete, duke e cilësuar situatën si një sfidë serioze për stabilitetin ekonomik. “Sektorë si transporti, bujqësia, turizmi dhe industria prodhuese konsiderohen më të ekspozuarit. Në qendër të kërkesave është rishikimi i barrës fiskale mbi karburantet, që sipas bizneseve përmban një peshë të lartë taksash. Kërkohet transparencë e plotë në formimin e çmimit, forcim i kontrollit të tregut dhe hetim i rasteve të mundshme të abuzimit. N jë tjetër kërkesë lidhet me masa mbështetëse për sektorët më të goditur, si dhe ndërhyrje afatgjata, përfshirë krijimin e rezervave strategjike të naftës, diversifikimin e burimeve të energjisë dhe investime në energji alternative”, tha Kryetari i Forumit Ekonomik mbarëkombëtar Besim Beqaj. Biznesi paralajmëron se, nëse nuk merren masa të menjëhershme, pasojat mund të jenë rritje të mëtejshme çmimesh, frenim investimesh dhe rrezikim i vendeve të punës. “Është ndjerë shumë rritja e çmimit të karburantit, për arsye se nuk lëvizim me çmimin e biletës”, tha Kreu i Shoqatës së Transportit Qytetas, Kujtim Mema. “E ka dëmtuar industrinë, na ka vendosur në një pozicion jo të barabartë me vendet me të cilat konkurrojmë”, tha Kreu i Shoqatës së Bimëve Medicinale, Filip Gjoka. “Asnjërit s’i intereson të dëmtohen të ardhurat në buxhetin e shtetit, por jo të rriten në dëm të sipërmarrësve”, tha Nikolin Jaka. Përfaqësuesit e biznesit kërkojnë edhe arritjen e dialogut qeveri-biznes, duke argumentuar se vetëm përmes politikave të koordinuara mund të shmangen efektet afatgjata të krizës së karburanteve.