Ky është momenti kur polumbarët nxjerrin nga liqeni i Shkopetit makinën e 23-vjeçarit Renis Dobra, pas më shumë se 48 orësh kërkime. Ekipet e zhytjes kërkuan për dy ditë në thellësi të ujit për gjetjen dhe nxjerrjen e makinës, që u hodh në liqen bashkë me trupin e të riut, i cili u gjet pa shenja jete buzë liqenit të Shkopetit, mëngjesin e të mërkurës. 23-vjeçari Renis Dobra humbi kontaktet me familjen të martën dhe pas denoncimit të të atit, policia nisi kërkimet, duket e gjetur të pajetë buzë liqenit. Pas ekzaminimeve të trupit të 23-vjeçarit rezultoi se i riu kishte maviosje në qafë, çka e shtyn grupin hetimor të mendojë se i riu është mbytur nga persona ende të paidentifikuar. Dyshohet se trupi ka dalë nga makina kur ajo ka qenë në rënie të lirë për në liqen, si një formë që autorët kishin zgjedhur për të fshehur krimin e rëndë. Policia vijon marrjen në pyetje të familjarëve të të riut, ndërsa pritet ekspertiza e trupit të 23-vjeçarit dhe e mjetit të tij, që u nxor nga liqeni, si prova që do i shërbejnë hetimit të kësaj ngjarjeje të rëndë për të shkuar te emrat e autorëve. Grupi hetimor po verifikon për një konflikt të kohëve të fundit apo përfshirja e të riut në ndonjë aktivitet të paligjshëm, ndonëse ai dhe familja e tij rezultojnë pa ngarkesa penale.