Policia e Kosovë ka arrestuar 31 persona mes të cilëve 12 janë zyrtarë të Agjencisë për Zhvillimin e Bujqësisë. Të arrestuarit dyshohet se janë përfshirë në veprat penale; si marrje dhe dhënie ryshfeti, keqpërdorim i pozicionit të zyrtarit publik, mashtrim me subvencione, si dhe falsifikim dokumentesh. Në mesin e 31 të arrestuarve të premten, sipas autoriteteve, 12 janë zyrtarë, ndërsa 19 persona janë përfitues subvencionesh. Lajmin e njoftoi Prokuroria e Posaçme dhe policia e Kosovës ndërsa arrestimet u kryen në tetë komuna, Pejë, Istog, Ferizaj, Lipjan, Prishtinë, Kllokot, Vushtrri dhe Podujevë. Mësohet se arrestimet e së premtes janë në vazhdën e operacionit me emrin e koduar "subvencioni", që ka nisur në muajin shkurt të këtij viti, kur u arrestuan edhe 12 persona të tjerë, nga të cilët 10 zyrtarë të Agjencisë për Zhvillimin e Bujqësisë. Edhe në atë rast mbi të ndaluarit rëndonin të njëjtat akuza si sot, keqpërdorim i detyrës zyrtare dhe marrje ryshfeti. Ndërkohë në muajin qershor në kuadër të po këtij operacioni, u arrestuan dhe 21 persona, nga të cilët 14 zyrtarë të Agjencisë për Zhvillimin e Bujqësisë.