Bashkimi Evropian ka mbajtur takim të përbashkët me kryenegociatorët e Serbisë dhe Kosovës në përpjekje për të gjetur zgjidhje për dinarin. Emisari special për dialogun, Mirsolav Lajcak fillimisht palët i takoi ndaras e pastaj së bashku, ku u ka kërkuar që deri të premten të dorëzojnë propozimet e tyre mbi këtë çështje. Kryenegociatori i Kosovës, Besnik Bislimi ka bërë të ditur se javën e ardhshme do të ketë përsëri takim për t’i diskutuar propozimet e palëve. Mes tjerash ai ka njoftuar se pala serbe edhe në këtë takim është deklaruar se nuk e njeh Marrëveshjen bazë të arritur një vit më parë. “Kryenegociatori serb iu bishtnua përgjigjes disa herë, në fund tha se për Serbinë është problematike marrëveshja pasi ka nene të cilat merren me statute, sidomos ato nene që tregojnë për respektimin e integritetit territorial, për anëtarësimin e Kosovës në organizata ndërkombëtare dhe të ngjashme. Në fakt, na u tha që Serbia nuk e njeh marrëveshjen si të tillë. Ai tha se për Serbinë është e pamundur të nënshkruhet një marrëveshje me Kosovën”, tha Bislimi. Në takim u diskutua edhe për zbatimin e Marrëveshjes bazike për normalizim dhe aneksin e saj, për dokumentin për termin e referencës për personat e zhdukur me dhunë dhe për energjinë.