Izraeli iu përgjigj me një breshëri raketash drejt kryeqytetit të Jemenit, Sana'a, sulmeve të rebelevë Huthi që kishin shënjestruar më herët tokën e shtetit hebre. 6 vetë humbën jetën në Jemen, e 86 të tjerë u plagosën në ofensivën më të fundit të një viti sulmesh dhe kundërsulmesh të drejtpërdrejta midis Izraelit dhe militantëve Huthi në Jemen, pjesë e një vazhdimësie të konfliktit në Gaza. IDF-ja pohoi se objektivat e saj përfshinin një kompleks ushtarak që strehon pallatin presidencial, e po kështu u mësynë dy termocentrale dhe depo karburanti. "Këto sulme ishin përgjigje ndaj incidenteve të përsëritura nga regjimi terrorist Huthi kundër Shtetit të Izraelit dhe civilëve të tij, duke përfshirë lëshimin e raketave tokë-tokë dhe UAV-ve drejt territorit izraelit në ditët e fundit”, deklaroi ushtria izraelite. Të premten, Huthit thanë se kishin lëshuar një raketë balistike drejt Izraelit në mësymjene tyre të fundit për të cilën deklaruan se ishte në mbështetje të palestinezëve në Gaza. Një zyrtar i forcave ajrore izraelite tha të dielën se raketa ka shumë të ngjarë të ketë mbajtur disa municione të vogla “të destinuara të shpërthenin pas përplasjes”. “Kjo është hera e parë që ky lloj rakete është lëshuar nga Jemeni”, theksoi ai. Që prej fillimit të luftës së Izraelit në Gaza kundër grupit militant palestinez Hamas tetorin e vitit 2023, Huthit e lidhur me Iranin kanë sulmuar vazhdimisht anije në Detin e Kuq në atë që e përshkruajnë si akte solidariteti me palestinezët. Ata gjithashtu kanë lëshuar shpeshherë raketa drejt Izraelit, shumica e të cilave janë interceptuar. Izraeli është përgjigjur me sulme në zonat e kontrolluara nga Huthitë në Jemen, përfshirë portin jetik të Hodeidah-së.