Konflikti mes SHBA-së, Izraelit dhe Iranit vijon të mbetet i tensionuar, ndërsa lufta po zgjerohet edhe më tej në rajon. Mediat ndërkombëtare raportojnë se Izraeli ka vendosur trupa ushtarake në Azerbajxhan, duke sjellë reagimin e ashpër të Teheranit. Nga Uashingtoni, presidenti amerikan Donald Trump është shprehur se do të ishte “i nderuar” të takohej me Udhëheqësin Suprem të Iranit, Mojtaba Khamenei, nëse arrihet një marrëveshje që do t’i jepte fund luftës mes dy vendeve. Megjithatë, në tryezën diplomatike mbeten ende shumë pikëpyetje. Irani ka hedhur poshtë raportimet se ka pranuar transferimin jashtë vendit të uraniumit të pasuruar, ndërsa vijojnë përplasjet lidhur me fondet iraniane të bllokuara dhe heqjen e sanksioneve ekonomike. Edhe në Liban situata po bëhet gjithnjë e më e rëndë. Sipas autoriteteve shëndetësore në Bejrut, të paktën 12 persona janë vrarë në orët e fundit si pasojë e sulmeve izraelite në zonat mes Tiros dhe Nabatiyes. Sulmet janë pjesë e një vale të re bombardimesh që po shton frikën për zgjerimin e konfliktit në të gjithë rajonin. Edhe pasojat ekonomike të luftës po ndiqen me shqetësim. Bashkimi Evropian ka deklaruar se, për momentin, nuk parashikohet mungesë e karburantit për avionët, pavarësisht tensioneve në Lindjen e Mesme. Brukseli ka kërkuar rihapjen sa më të shpejtë të Ngushticës së Hormuzit, një prej korridoreve më të rëndësishme për transportin e naftës në botë.