Pas disa orësh shkëmbime të ndërsjella sulmesh, Irani njoftoi se ka pezulluar operacionet ushtarake kundër Izraelit, por paralajmëroi se do t'i rifillojë ato me intensitet më të lartë e më shkatërrues, nëse sulmet nga pala tjetër vazhdojnë, përfshirë edhe në Libanin jugor. "Forcat e Armatosura të Republikës Islamike të Iranit, në mbështetje të popullit të shtypur të Libanit, i kanë dhënë një përgjigje të dhimbshme Izraelit", ka thënë ushtria iraniane në një deklaratë të cituar nga agjencia e lajmeve “Tasnim”. Në deklaratën e saj, ushtria iraniane nuk shpalli një armëpushim, por një operacion të përfunduar, me disa kushte. Ata paraqitën ndaljen e luftimeve jo si ulje të tensioneve, por si një mesazh të dërguar, në përpjekje për të ruajtur imazhin e forcës. Edhe Izraeli ka vendosur të pezullojë sulmet e drejtpërdrejta kundër Iranit pas një kërkese nga Presidenti i SHBA-së, Donald Trump. “Të dyja palët, Izraeli dhe Irani, po synojnë të arrijnë një armëpushim të menjëhershëm”, tha Trump, duke shtuar se negociatat përfundimtare për një marrëveshje paqeje SHBA-Iran po vazhdojnë dhe se bllokada amerikane ndaj porteve iraniane do të mbetet në fuqi deri në arritjen e një marrëveshjeje përfundimtare. Menjëherë pas reagimit të Trump, mediat izraelite raportuan se në Jerusalem ishte marrë një vendim për të ndaluar sulmet ajrore në tokën iraniane. Irani dhe Izraeli shkëmbyen sulme me raketa herët të hënën. Sulmet nisën nga Teherani në disa pjesë të Izraelit, që sollën dhe reagimin e Tel Avivit. Pas sulmeve reagoi edhe Bashkimi Evropian, duke njoftuar sanksione ndaj Iranit. Shefja e politikës së jashtme të BE-së, Kaja Kallas, tha se shtetet anëtare kanë sanksionuar Iranin për "kufizimin e trafikut detar" në ngushticën e Hormuzit, ndërsa shtoi se dronët e Teheranit po kërcënojnë kalimin e sigurt të anijeve përmes rrugës ujore kyçe. Kjo është hera e parë që Bashkimi Evropian zbaton regjimin e saj të ri të sanksioneve për lirinë e lundrimit.