Ministrja e Jashtme e Kosovës njoftoi të premten se i ka dërguar notë proteste Maqedonisë së Veriut duke i kërkuar sqarime sa më të shpejta dhe të plota për incidentin në Aeroportin e Shkupit në të cilin u përfshi presidentja Vjosa Osmani. Sipas njoftimit të Ministrisë, presidentja Osmani është përballur me trajtim të papërshtatshëm dhe të kundërligjshëm nga sigurimi i Aeroportit të Shkupit. Ministrja e Jashtme, Donika Gërvalla, sipas njoftimit, ka takuar menjëherë mbrëmjen e së enjtes pas incidentit ambasadoren e Maqedonisë së Veriut në Kosovë. Gjithashtu, Ministrja Gërvalla ka realizuar një takim me zëvendëskryeministrin e Maqedonisë së Veriut, Arben Fetai, me të cilin kanë diskutuar rreth incidentit në fjalë dhe nevojën e ndërmarrjes së veprimeve të shpejta institucionale. Presidentes Vjosa Osmani i është tentuar t’i merret telefoni nga sigurimi i Aeroportit të Shkupit të enjten. Madje, siç thuhet në njoftimin zyrtar, Osmani është tentuar të shtyhet edhe fizikisht. Kjo nxiti reagime të shumta. Partitë shqiptare që janë në pushtet në Maqedoninë e Veriut shfajësuan veten, ndërsa Bashkimi Demokratik për Integrim kërkoi përgjegjësi ligjore e politike nga të përfshirët.