Agjencitë ligj-zbatuese shqiptare në bashkëpunim me drejtorinë e emigracionit në policinë e shtetit, prej më shumë se një muaji, kanë çuar në qendrën e mbyllur për të huajtë në Karrec, disa ish antarë të opozitës iraniane. Top Channel mëson se janë 5 shtetas Iranian të cilët janë larguar me dëshirën e tyre nga MEK dhe tashmë mbahen në këtë qendër për emigrantët. Një burim qeveritar në brendësi të këtij zhvillimi tha se “Për arsye të sigurisë kombëtare prej më shumë se një muaj në qendrën e pritjes të emigrantëve në Karrec, mbahen disa prej personave të cilët me vullnetin e tyre janë shkëputur nga MEK". Mësohet se pas konsultimeve me partnerët është mbërritur në përfundim se ekzistojnë rrethana dhe informacione se këta persona po përdoreshin nga Irani kundra MEK. Ky është Hassan Hyerani, një prej pesë iranianëve që po mbahet në Karrec. Ai ka hyrë në një grevë urie. Sakaq autoritetet ligj-zbatuese shqiptare janë duke hetuar një tentativë të ditëve të fundit të Iranit për të shpërndarë informacione të rreme në Shqipëri, në lidhje me ndalimin e të pestëve. Në të tilla kushte është vlerësuar se ish antarët e MEK, të grupuar në një shoqatë, përbënin rrezik për cenimin e sigurisë kombëtare. SPAK për llogari të një hetimi lëshoi 12 urdhra kontrolli banese dhe zyrash për personat e larguar nga MEK. Pjesë e kontrollove ishin edhe zyrat e shoqatës ASILA në krye të cilës qëndronte Hassan Hyerani. Prej muajit Korrik SPAK ka një hetim aktiv ndaj 20 iranianëve , ish anëtar të MEK nën dyshimin për spiunazh në shërbim të regjimit iranian.