Kryeministri Edi Rama komentoi me nota forte kritike vetërritjen e pagave nga gjyqtarët dhe prokurorëve pa pritur vendimin e parlamentit. Për situatën e krijuar tha se “pavarësia e gjyqësorit ka rrëshqitur në papërgjegjshmëri dhe se “burimi është “kuturisja” për të marrë një vendim arbitrar për pagat e gjyqësorit duke kërkuar që Thesari i Shtetit të hapë derën”. Tek sa debati qeveri-magjistratë për pagat vijon, kryeministri Edi Rama publikoi disa të dhëna krahasuese, të rrogave për njerëzit e drejtësisë në vendin tonë dhe ata në rajon. Në platformën X kryeministri Rama thotë se “një gjykatës fillestar sot në Shqipëri merr 500 Euro pagë më të lartë se sa kolegu në Greqi dhe me vendimin e marrë vetë Zot vetë Shkop, paga duhet të rritet 2000 Euro më shumë në muaj se sa kolegu grek dhe 3000 Euro më shumë se sa kolegu në Malin e Zi”. Këto të dhëna krahasimore tregojnë pagat e gjyqtarëve të rinj shqiptarë. Ato renditen të dytat pas atyre në Rumani ku një gjyqtar atje paguhet 3.665 euro ndërsa në vendin tonë paguhet 3.241 euro. Në renditjen e pagave Shqipëria lë pas Slloveninë, Greqinë, Bullgarinë, Bosnjë Hercegovinën, Kroacinë, Malin e Zi dhe Serbinë. Ndërkohë nga po e njëjta tabelë, publikuar nga kryeministri Edi Rama nga përllogaritja me pagën vendosur vetes nga magjistratët shqiptarë pas vendimit të Gjykatës Kushtetuese, paga mujore e një drejtësi-dhënësi shkon në 4.886 euro. Kjo do të thotë se pagat e magjistratëve shqiptarë kalojnë nga vendi i dytë në rajon në vendin e parë me një diferencë prej plus 1221 euro nga vendi i parë me rrogat më larta Rumania në vendin e parë. Po për këtë çështje një ditë më parë, kryeministri Edi Rama publikoi këtë tabelë, të dhënat e të cilës i vlerëson si të tmerrshme, nga ku del në pah se, nëse rrogat e magjistratëve do të rriten sipas formulës së tyre duke nisur nga 1Prilli 2023 atëherë, kosoja totale e buxhetit të shtetit do të jetë 12 miliardë lekë ose 130.5 milion euro.