Një gjykatë federale në Shtetet e Bashkuara i doli kundër administratës së presidentit Donald Trump, me vendimin e saj në favor të mijëra emigrantëve që ishin penguar të përfitonin nga procedurat dhe të drejtat ligjore, vetëm për shkak të vendit të tyre të origjinës. Gjykatësi federal theksoi se këta emigrantë kishin ndjekur të gjitha procedurat e miratuara nga Kongresi dhe të zbatuara nga Shërbimi Amerikan për Shtetësi dhe Emigracion, por megjithatë kishin pritur muaj të tërë që kërkesat e tyre të shqyrtoheshin, ndërsa agjencia refuzonte t’i përpunonte ato. Sipas vendimit, politikat e zbatuara nga ky shërbim nuk bazoheshin në ligj ose rregullore dhe ishin të ndikuara nga qëndrime kundër emigracionit, të cilat nuk mund të përdoren në procesin e vendimmarrjes. Gjykatësi shkroi se: “Vonesat në procedura nuk janë rezultat i ndonjë gabimi të këtyre individëve, por ato burojnë vetëm nga vendi i tyre i lindjes.” Vendimi përbën një fitore të madhe për një koalicion organizatash që mbrojnë të drejtat e emigrantëve dhe sindikatave, të cilat kishin ngritur padi kundër politikave të Shërbimit të Emigracionit në mars, duke argumentuar se agjencia, që vepron nën Departamentin Amerikan të Sigurisë Kombëtare, kishte ndaluar padrejtësisht përpunimin e kërkesave ligjore të emigrantëve. Presidentja e organizatës ligjore “Democracy Forëard”, Skye Perryman, tha se vendimi riafirmon parimin themelor se qeveria federale nuk mund të mbyllë rrugët ligjore të emigracionit dhe nuk mund të diskriminojë individët bazuar në origjinën e tyre.