Ish-polici Arjan Tase që përplasi për vdekje me skaf vogëlushen Jonada Avdia dy vite më parë, në breg të detit në Potam, duke shkelur çdo rregull të sigurisë u dënua sot nga Gjykata e Vlorës. Trupa gjykuese nën kryesimin e gjyqtares Alba Ngresi e dënoi me 18 vite burg ish-policin, pavarësisht se Prokuroria kishte kërkuar të dënohej me 15 vite burg. Ish-efektivi Tase sqarohet në vendimin e marrë sot nga Gjykata e Vlorës përfiton nga gjykimi i shkurtuar dhe do të vuajë vetëm 12 vite burg për tragjedinë e shkaktuar familjes Avdia me origjinë nga Tropoja, që prej dy dekadash jetonte në Angli, por ato ditë gushti të vitit 2022 kishin zgjedhur atdheun për të pushuar. Ngjarja e rëndë që tronditi mbarë opinionin publik ndodhi mesditën e 22 gushtit në Potam të Himarës, teksa vogëlushja Jonada lahej buzë detit me të atin. Ish-polici Tase drejtonte një skaf me të cilin transportonte disa njerëz në breg dhe në momentin kur është nisur për të dalë nga zona ku notonte vogëlushja me të atin, skafi ka marrë shumë shpejtësi dhe në marrjen e kthesës motorrët e tij kanë kapur vajzën e mitur duke e prerë në të gjithë trupin.