Banka e Shqipërisë vendos të mbajë të pandryshuar normën bazë të interesit, në një kohë kur ekonomia përballet me pasiguri të shtuara nga tregjet ndërkombëtare dhe rritja e çmimeve. Gjatë konferencës për shtyp mbi vendimmarrjen e politikës monetare, guvernatori Gent Sejko theksoi se institucioni ka zgjedhur të mos ndryshojë kursin aktual, pavarësisht presioneve të reja inflacioniste. “Konflikti ushtarak dhe tensionet gjeopolitike në Lindjen e Mesme mbeten një burim rreziku dhe pasigurie mbi ekonominë botërore dhe atë shqiptare. Bazuar në sa më sipër, Këshilli Mbikëqyrës i Bankës së Shqipërisë vendosi të mbajë të pandryshuar normën bazë të interesit, në nivelin 2.5%”, u shpreh Sejko. Sipas guvernatorit, rritja e çmimit të naftës në tregjet ndërkombëtare dhe tensionet gjeopolitike pritet të ndikojnë në rritjen e inflacionit në muajt në vijim, duke e çuar atë mbi objektiv. Megjithatë banka vlerëson se ky është një fenomen i përkohshëm dhe politika aktuale mbetet e përshtatshme për stabilitetin ekonomik. “Rritja e çmimit të naftës dhe përcjellja e tij në artikujt e tjerë, pritet të shoqërohet me rritje të inflacionit të importuar gjatë tremujorëve në vijim”, shtoi Sejko. Banka Qendrore paralajmërojnë gjithashtu se këto zhvillime mund të sjellin ngadalësim të rritjes ekonomike, ndërsa pasiguria mbetet e lartë për shkak të situatës globale. Në këtë kontekst, Banka e Shqipërisë do të vijojë të ndjekë nga afër zhvillimet në tregje, duke ruajtur një qëndrim të kujdesshëm në muajt në vijim.