Diskutimet mbi buxhetin e ardhshëm të BE-së kanë nxjerrë në pah shqetësimet mes vendeve anëtare, sidomos të atyre që konsiderohen shtete donatore të cilat po këmbëngulin për shkurtime të ndjeshme, që mbërrijnë në miliarda euro. Kancelari gjerman Friedrich Merz, së bashku me krerët e qeverive të pesë shteteve të tjera insistojnë për masa drastike. Këto komente ai i bëri pas një takimi në Berlin ku ishin të pranishëm kryeministrja daneze Mette Frederiksen, kryeministri finlandez Petteri Orpo dhe kancelari austriak Christian Stocker. Kryeministrat e Holandës dhe Suedisë morën pjesë nëpërmjet video-konferencës. Këto gjashtë vende financojnë rreth 40% të buxhetit europian. Merz theksoi gjithashtu se „vendet në fjalë ofrojnë gjithashtu 70% të ndihmës dypalëshe nga vendet anëtare të BE-së për Ukrainën". "Ne nuk jemi dorështrënguar, por rritjet shifrave të propozuara nga Komisioni nuk përputhen me realitetin" – u shporeh ai. Në një deklaratë të përbashkët, grupi i shteteve kontribuese të Unionit bëri thirrje për "realizëm dhe reforma" për kornizën financiare shumëvjeçare, e cili hyn në fuqi më 1 janar 2028. "Në një kohë kur praktikisht të gjitha shtetet anëtare po ndërmarrin masa "të dhimbshme” buxhetore, buxheti i BE-së nuk mund të jetë përjashtim" - thuhet në deklaratë, ku u hodh gjithashtu poshtë emetimi i ri të borxhit të përbashkët të BE-së me argumentim se "kjo nuk është zgjidhje për sfidat tona buxhetore dhe alternativë ndaj reformave strukturore”. Po kështu u kërkua që institucionet e BE-së duhet t'i menaxhojnë detyrat e tyre me nivelet ekzistuese të personelit, pa punësime të reja.