Bashkimi Evropian propozon një paketë të re masash kufizuese ndaj Rusisë, ku për herë të parë kërkohet të ndalohet hyrja në union e ushtarëve rus. Paketa e re synon të godasë më tej bankat, sektorët e energjisë, shërbimeve financiare dhe kriptovalutave, tregtisë dhe të ardhurat e Kremlinit nga nafta. “Ne propozojmë për herë të parë të ndalojmë hyrjen në Bashkimin Evropian të kujtdo që ka shërbyer në forcat e armatosura ruse që nga fillimi i luftës. Pra, Evropa mbetet e ndaluar për këdo që ka marrë pjesë në pushtimin e Ukrainës, kaq e thjeshtë”. Propozimi për t’iu ndaluar vizat ushtarëve rus është masa më e fundit shtrënguese e BE-së kundër Rusisë dhe pritet të miratohet unanimisht nga 27 vendet anëtare. Kjo është paketa e 21 e sanksioneve të unionit ndaj Kremlinit që nga pushtimi i Ukrainës në shkurt të 2022. Masat u prezantuan nga Von der Leyen, e cila sqaroi se në sektorin e energjisë, Komisioni Evropian po propozon të pezullojë deri në janar të vitit të ardhshëm rregullimin automatik të çmimit maksimal të naftës ruse, duke përmendur trazirat në tregjet ndërkombëtare të energjisë për shkak të krizës në Lindjen e Mesme dhe problemet në zinxhirët globalë të furnizimit. Po ashtu, Komisioni propozon vendosjen e sanksioneve ndaj 30 anijeve të tjera të të ashtuquajturës “flotë në hije” që përdoren për të transportuar naftën ruse, duke e çuar numrin e përgjithshëm të anijeve të synuara në mbi 660. Presidentja e Komisionit njoftoi më në fund se në ditët në vijim BE-ja do të hapë kapitullin e parë të negociatave me Ukrainën dhe Moldavinë, duke shënuar fillimin e fazës tjetër të procesit të tyre të pranimit.