Një aksident i rëndë me pasojë vdekjen është regjistruar mbrëmjen e sotme në aksin rrugor Lushnje- Fier pranë fshatit Rrapëz. Sipas informacioneve paraprake, një burrë që po lëvizte me biçikletë është përplasur nga një mjet taksie. Për shkak të plagëve të marra, këmbësori ka humbur jetën menjëherë në vendngjarje. Viktima, i identifikuar si Skender Maledhi, 70 vjeç, tentoi të kalonte me biçikletë në anën tjetër të autostradës, por u mor përpara nga mjeti taksi. Menjëherë pas njoftimit, në vendin e aksidentit kanë mbërritur shërbimet e Policisë dhe grupi hetimor, të cilët po punojnë për zbardhjen e plotë të rrethanave. Drejtuesi i mjetit, Genci Shahini, 52 vjeç, është shoqëruar për veprime të mëtejshme procedurale. Në vendngjarje kanë mbërritur edhe familjarë të viktimës. Policia po heton për të përcaktuar shkaqet e aksidentit, ndërsa paraprakisht dyshohet se ngjarja ka ndodhur në kushte errësire dhe me dukshmëri të kufizuar.