Qershori, korriku dhe gushti i këtij viti kanë qenë muajt më të nxehtë të regjistruar ndonjëherë, dhe kjo e bën verën e këtij viti më të nxehtën që prej fillimit të matjeve të temperaturës. Shërbimi i BE-së për Klimën Copernicus në Bon thotë se rekordet e njëpasnjëshme të shënuara deri më tani shtojnë probabilitetin që në tërësi, 2024 të mbyllet si viti më i ngrohtë që ka parëglobi. “Ngjarjet ekstreme të lidhura me temperaturat po bëhen më intensive e pasojat për njerëzit dhe planetin do të jenë gjithmonë e më shkatërruese, nëse nuk marrim masa urgjente për të reduktuar emetimet”, thuhet në njoftim. Temperatura mesatare për të tre muajt e verës 2024 ka qenë në total 0,69 gradë celsius mbi vlerën përkatëse të referencës së krahasimit me vitet nga 1991 deri më 2020. Kësisoj niveli më i lartë deri tani i temperaturave për verën e ka tejkaluar atë të viteve të mëparshme. Në Europë ajo ishte 1.54 gradë mbi mesataren për muajt e verës. Rekordi kishte dhënë shenja qysh përpara. Qershori 2024, sipas të dhënave të ekspertëve të Copernicus, me një temperaturë në sipërfaqe prej 16,66 gradë Celsius ka qenë më i nxehtë se kurrë më parë. Në korrik ishte po ashtu nxehtë mbi mesataren, një rekord nuk u arrit për fare pak. Për gushtin edhe pse nuk është matur niveli i ri maksimal, me një mesatare prej 16,82 grad ka qenë kaq i nxehtë, sa në rekordin e deritanishëm të regjistruar në gusht 2023.