Pamjet tregojnë momente nga jeta e artistes së ndjerë britanike Amy Winehouse dhe vendet që ajo frekuentonte në Camden, në veri të Londrës, në përvjetorin e 10 të vdekjes së parakohshme. Mediat në Britani thonin sot se Amy Winehouse ishte ndoshta artistja më e talentuar e gjeneratës së saj. Kjo pasi deri në kohën e vdekjes së saj më 23 korrik 2011 në moshën 27 vjeçare, ajo kishte lënë tashmë shenjën e saj të patjetërsueshme te arti e muzika, teksa kujtohej me dhimbje nga miliona njerëz në të gjithë botën. 10-vjetori i vdekjes së Winehouse gjithashtu po kujtohet me libra e dokumentare, si për rritjen e saj meteorike si artiste, ashtu dhe për vdekjen e parakohshme. Artistja e trazuar u gjet e vdekur në shtëpinë e saj në Londër, sipas autoriteteve prej helmimit nga alkooli. Kantautorja njihej për hitet e saj të muzikës “jazz-soul” që megjithse të errëta, kishin një audiencë universale prej natyrës se thellë shpirtërore dhe vargjeve të kulturës popullore. Winehouse është imortalizuar me një statujë jetësore bronzi në Camden të Londrës, në kohën kur do të kishte qenë ditëlindja e saj e 31-të në vitin 2014.