Nisin gërmimet në Serbi/ 7 km nga kufiri me Kosovën kërkohen trupat e shqiptarëve të vrarë në luftë

Shtatë kilometra larg kufirit të Jarinjës mes Kosovës dhe Serbisë, tek gurorja “Kishevak” në Komunën e Rashkës, autoritetet serbe kanë filluar gërmimet për gjetjen e trupave mortore që dyshohen të jenë të shqiptarëve civil nga lufta e fundit në Kosovë. Numri i personave të varrosur dyshohet të jetë rreth 17, nga dy fshatra të Kosovës. I gjithë procesi po mbikëqyret nga pala kosovare dhe ajo ndërkombëtare, për çka fillimisht ishte dashur një angazhim 5 vjeçar për lokalizimin e mbetjeve mortore. Kryetari i delegacionit të Kosovës për të pagjeturit, Ibrahim Makolli tha se kjo strategji e ndjekur nga ish presidenti i Jugosllavisë, tregon tendencën për fshehjen e krimeve.