Fiks Fare denoncoi mbrëmjen e së hënës një ngjarje të ndodhur në datën 5 mars 2024, ku një mjeke është dhunuar nga disa punonjës policie, të cilët po shoqëronin kryeministrin Edi Rama. “Unë që kisha shenja në trup më akuzuan se dhunova policen. Prokuroria s’bëri ekspertizë për policen, por vetëm e kqyrën kolegët e saj” tha mjekja, teksa shtoi se çështja shkoi për gjykim vetëm ndaj saj. Policët nuk u hetuan, pavarësisht se mjekja kishte dëmtime trupore! Sipas saj, në datën 5 mars 2024, në afërsi të punës së saj, ka kaluar eskorta e kryeministrit Edi Rama dhe disa punonjës të policisë i janë afruar makinës së vëllait të saj. Më tej pohon se ndodhej në trotuar dhe një punonjës policie goditi me forcë kofanon e mjetit të të vëllait dhe i kërkoi të largohej. Për këtë gje është shoqëruar në komisariat dhe sipas saj është dhunuar nga ana e punonjësve të policisë.