Zvicra do t'i sigurojë Presidentit rus Vladimir Putin imunitet nga ndjekja penale nëse ai do të vijë në vend për bisedime mbi paqen në Ukrainë, tha të martën Ministri i Jashtëm Zviceran Ignazio Cassis. Putini përballet me një urdhër arresti të lëshuar nga Gjykata Ndërkombëtare Penale. Por vitin e kaluar, qeveria zvicerane rishkroi "rregullat për dhënien e imunitetit një personi nën një urdhër arresti ndërkombëtar. Kështu, sipas rregullave të reja, një person në kërkim ndërkombëtar mund të fitojë imunitet nëse vjen në vend për një konferencë paqeje e jo për arsye private", tha ministri në një konferencë për shtyp. Pas takimit të së hënës në shtëpinë e bardhë mes presidentit amerikan Donald Trump, atij ukrainas Volodimir Zelenski dhe liderëve evropianë, u raportua se Putin kishte pranuar një takim kokë më kokë për paqen me homologun ukrainas. Presidenti francez, Emmanuel Macron, propozoi Gjenevën si mikpritëse të takimit të ardhshëm dhe ideja u mbështet edhe nga Italia dhe vende të tjera. Ndonëse kremlini nuk ka konfirmuar zyrtarisht asgjë, gjasat janë që takimi Putin-Zelenski të mbahet brenda dy javëve në vijim. Ky takim do të pasohet më tej sipas shtëpisë së bardhë edhe nga një tekim trepalësh, Putin-Zelenski-Trump.